RasistaPressan

Pressan.is greinir svínslega frá stofnun nýs heimavistaskóla (efterskole) í Danmörku fyrir múslíma. Án nokkurrar skýringar eða sjáanlegrar ástæðu setur Pressan mynd í sína frétt sem ekki var við frétt Kristeligt Dagblads sem greinir frá þessum nýja skóla. Pressan setur inn mynd af litlum dreng í hópi þriggja kvenna sem klæðast niqab-hulu. Það gerir Kristeligt Dagblad ekki. Það segir sig sjálft, að ef þessi nýi skóli er fyrir bæði kynin munu þar engir verða sem klæðast niqab.

Þessi mynd á ekkert skylt við skólann sem sagt er frá, og er ekki einu sinni tekin í Danmörku, þar sem maður sér mjög sjaldan konur í niqab með hanska.

Léleg blaðamennska, sem ber keim af fleiri ljótum fordómum, m.a. þegar hátíðin ramadan er kölluð "ramöndin", ekki ósvipað og þegar Illugi Jökulsson skrifar Egiftaland. Ég óska nú þegar fíflinu sem skrifaði þetta Gleðilegra Júlla. Blaðamaðurinn ætti frekar að hafa sagt frá íranskfædda prestinum sem ekki er velkominn í sumar danskar kirkjur, þar sem kristnir eru hræddir við að það leiði af sér öfgar múslíma (sjá hér).

Athugasemdir

[Vilhjálmur Örn Vilhjálmsson, 6.6.2013 kl. 00:10]

Hver ætli hafi skrifað fréttina í Pressunni?

[Þorvaldur S (IP-tala skráð) 6.6.2013 kl. 17:27]

Í hverju eru fordómar Illuga fólgnir þegar hann skrifar „Egiftaland“?  Þessi ritháttur er bæði gamall og nýr í málinu og má m.a. sjá í Orðabók Marðar frá 1985.  En kannski er Mörður að opinbera sína svívirðilegu fordóma með því að birta þennan rithátt? 

Um rithátt orðsins hefur gamall kennari minn, Baldur Jónsson, skrifað fróðlegan pistil.  Hjá honum nam Mörður líka og ber því að kenna Baldri alfarið um þessa svívirðu. http://www.almanak.hi.is/egiptala.html

[Vilhjálmur Örn Vilhjálmsson, 10.6.2013 kl. 19:03]

Ekki skrifaði ég neitt um fordóma Illuga, aðeins að menn séu að klæmast á orðinu ramadan líkt og þegar Illugi kallar Egyptaland Egiftaland, en ekki býst ég við því að Mörður eða Illugi séu vel að sér í grísku. Við getum líka kallað landið "Misr" eða "Masr" sem er arabíska nafn þess. Hvaða rithátt ætli Illugi finni á slík nöfn, kannski Mysur?

En hver ætli hafi skrifað þennan leirburð um skólann í Danmörku? Illugi kannski?

[Þorvaldur S (IP-tala skráð) 12.6.2013 kl. 23:05]

„Léleg blaðamennska, sem ber keim af fleiri ljótum fordómum, m.a. þegar hátíðin ramadan er kölluð "ramöndin", ekki ósvipað og þegar Illugi Jökulsson skrifar Egiftaland.“

Út úr þessum orðum er erfitt að lesa annað en það séu fordómar að skrifa „Egiftaland“ eins og það séu fordómar að skrifa „ramöndin“.  Ég get viðurkennt að það er hótfyndni, og kannski ekki fyndni, að tala um „ramöndina“ en hitt? 

Ég veit svo ekki um grískukunnáttu Illuga en Baldur heitinn, sem Mörður hefur sína visku frá um Egiftaland, var vel að sér í því máli og leiðir að því sterk rök að rithefð Íslendinga bjóði ufsilonleysi í Egiftalandi.  Engum dettur lengur í hug að skrifa „kyrkja“ eður „byskup“ þótt grískur ritháttur orðanna bjóði upp á það og jafnvel láta sumir sér sæma að skrifa „bleia“ og „peisa“ án þess að það sé almennt kallað klám.