Steinar í götu Dana

Ég hef ásamt öðrum hér í Danmörku, sem sitja í stjórn Selskabet for Dansk Jødisk Historie, hrint af stað verkefni til að minnast fórnarlamba nasismans og meðreiðarsveina þeirra í Danmörku. Verkefni þetta kallast Snublesten, og gengur út á að setja litla steina með messingplötu í gangstéttir fyrir utan hús þau, þar sem bjuggu þeir sem sendir voru úr landi af dönskum yfirvöldum og nasistum á stríðárunum, og voru síðar myrtir í fanga- og útrýmingarbúðum nasista.

Á messingplötuna verður grafið nafn og upplýsingar um þann sem minnst er. Hugmyndin er upphaflega ættuð frá Þýskalandi og mun listamaðurinn Gunter Demning, sem sett hefur þúsundir slíkar steinar í götu Þjóðverja, einnig setja þessa steina hér í stéttir Kaupmannahafnar, og annarra bæjarfélaga Í Danmörku.

Verkefnið er enn fjárvana, en í dag var greint frá því á vefsíðu Jyllands Posten. En það blað er sem kunnugt lesið um allan heim, eftir að einhver teiknari teiknaði svona listgóða teikningu af ljótum karli, sem ætlaði allt að gera vitlaust.  Nú hljóta góðir menn að hjálpa til að gera þetta verkefni okkar verði að veruleika.

Kannski eiga einhverjir á Íslandi nokkrar krónur aflögu?  Ég vildi bara nefna þetta, ef einhver hefði vonda samvisku á Íslandi. Ísland var enn í Ríkjasambandi við danska Konungsveldið, þegar þessir glæpir voru framdir. Ég greindi frá glæpum þessum í bók, sem út kom árið 2005 og sem örugglega er enn hægt að kaupa mjög ódýrt hjá forlaginu Vandkunsten, en einnig mun hún vera til á betri bókasöfnum á Íslandi.

Gunter Demning gengur frá steinum í Hamborg

Athugasemdir

[enok (IP-tala skráð) 19.3.2010 kl. 18:47]

Ef gyðingar yfirleitt segja teikninguna góða, af ljóta "kallinum" má búast við að stuðningsmenn "kallsins" verði illskeyttari við gyðinga en nasistinn forðum !

[Vilhjálmur Örn Vilhjálmsson, 19.3.2010 kl. 18:57]

Bókstafstrúarmaðurinn Enok. Ég skrifaði "listagóða teikningu" og það í samhengi við annað, og hvergi skrifaði ég að gyðingum þætti hún teikningin góð. Er írónía útlæg á Íslandi eftir hrunið? Þegar teikning æsir milljónir manna og gerir þá hálfsturlaða, hlýtur teikningin að vera góð! Nóg um það Jyllands-Posten er lesinn um allan heim, vegna þessarar merku teikninga sem við þorum ekki að birta. Þá verðum við að bíða enn lengu í biðröðum á flugvöllunum.

[Thrainn Kristinsson (IP-tala skráð) 20.3.2010 kl. 11:49]

Er þetta svona einfalt? Og voru þetta listagóðar teikningar? Já reyndar en þetta voru skrípómyndir sérstaklega pantaðar af ritstjórn JP til að ögra tilteknum minnihlutahópi í Danmörku.

Og af hverju hafnaði Carsten Juste ritstjóri JP í kjölfarið að birta "listagóðar teikningar" sem Íranskt dagblað birti af fórnarlömbum helfararinnar. Þar var líklega um að ræða minnihlutahóp í Danmörku sem JP vildi ekki móðga.

En hugmyndin um skildina í gangstéttina er góð

[Finnur Bárðarson, 20.3.2010 kl. 15:56]

Gott framtak. Annars hef ég verið að lesa um framgöngu Króata og Letta í helförinni. Jafnvel grimmustu SS mönnum ofbauð á stundum hvalalosti þessara þjóða gagnvart gyðingum. Það hefur verið undarleg þögn um aðkomu þeirra.

[Vilhjálmur Örn Vilhjálmsson, 20.3.2010 kl. 16:18]

Já Þráinn, Jyllands Posten tókst ætlunarverk sitt. En Þráinn, Múhamed var ekki neitt fórnarlamb. Í hans nafni er verið að drepa fólk í dag, og mismunandi deildir Íslam berast á banaspjót - í hans nafni. Þegar þeir svo sáu mynd af honum, í danskri útgáfu, varð allt vitlaust. Það vissu menn fyrir.

Árás íranskra yfirvalda á fórnarlömb nasismans hefur hvorki framkallað árásir á sendiráð Írans eða annarra múslímalanda, né hótanir um hryðjuverk. Holocaust-teikningar í Múslímalöndum kalla einvörðungu skömm yfir þau lönd og yfir þá múslíma sem nær daglega birta slíkar myndir og sem yfirlýst telja gyðinga, kristna og fólk af enn öðrum trúarbrögðum sér óæðra fólk.

Nasistar og öfgamúslímar eiga það sameiginlegt, að telja  skrípamyndir af fórnarlömbum stríðs til skemmtiefnis. Það er vegna þess að þessir hópar eiga það sameiginlegt að vilja allt í bál og brand, og einn hópurinn vitnar í Múhameð máli sínu til stuðnings. Hinn vitnar í þýskan vitleysing sem var jafnvel ljótari en Múhameð í Jyllands-Posten. 

En þessi teikning af spámanninum kemur ekki steinum til minningar um fórnarlömb fjöldamorða nasismans neitt við. Það var bara greint frá þessum steinum í sama danska dagblaðinu og teikningar af spámanninum birtast. Ég ætla svo bara að vona, að álíka margir sjái þessa grein og þeir sem sáu myndina af blessuðum karlinum honum Múhameð. Megi minning hans og ásjóna batna!

[Vilhjálmur Örn Vilhjálmsson, 20.3.2010 kl. 16:35]

Já Finnur, framganga Lettneskra SS-manna var ljót. Áður en Waffen SS-sveitin Kurland var stofnuð, höfðu margir lettneskir menn tekið þátt í morðum á gyðingum í Lettlandi og þeim gyðingum sem þangað voru fluttir. Talið er öruggt að Letta hafi sjálfir staðið að morðum á helmingi þeirra gyðinga sem í Lettlandi voru myrtir. Um daginn marséruðu gamlir SS menn i Lettlandi eins og þeir gera árlega. Þeir segjast allir saklausir, og segjast aðeins hafa verið að berjast gegn kommúnismanum og hættunni sem stafaði af Rússum, sem reyndar eru meirihluti þeirra Letta, sem búa í Riga í dag.

Það eru örugglega fantar á meðal allra þjóða, ef aðstæður leyfa.