Hallelúeliza

Í morgun hóstaði ég bókstaflega kaffi og brauði yfir morgunverðarborðið er ég skoðaði afrek FB-vina frá kvöldinu áður. Þar sá ég að einn þeirra boðaði þann gleðiboðskap að ný forsetafrú, Eliza Reid, væri gyðingur. Vitaskuld fagnaði þessi vinur og fjöldinn allur af öðrum vinum hans með honum.

Gyðingakonur eru hörkukonur eins og Dorrit, Lilith, Gertrud og Barbara Streisand hafa sýnt okkur. Hallelúja í hæstu hæðum fyrir þær. En um tíma í dag var Íslandi borgið því (auð)trúað fólk hafði frétt að kona Guðna forseta væri af ætt Abrahams. Gat verið að fólk væri farið að fagna fjölmenningunni með forseta vorum?

En ef ég hefði ekki vitað betur, þá hefði ég trúað öllu eins og nýslegnum dúkat. Þessa miklu "gleði" var að finna hjá fólki sem margt viðrar "kristilegan" stuðning sinn við Ísraelsríki og ári oft til að réttlæta hatur sitt á öðrum minnihlutahópum eða öðrum vandæðatrúarbrögðum en Kristni, þ.e. Íslam.  Vitanlega eiga Íslam og Fjölmenning gyðingahatur og ofsóknir á hendur gyðingum á samviskunni - líkt og Kristni fyrrum. En stuðningur við Ísraelsríki og Gyðingdóm eflist ekki við hatur á öðrum. Því er fjölmenningarhugsjónin ekki rík hjá þeim sem samgleðjast yfir fagnaðarerindinu um að það sé kominn ný gyðingakona í stofurnar og eldhúsið á Bessastöðum (og nú setjast rauðsokkur og femínistar klofvega yfir mig).

Eins og alltaf þegar menn hafa gyðinga á milli tannanna, komu mismunandi skoðanir á ágæti þess að Eliza á Bessó sé af ætt Abrahams, og jafnvel andgyðingleg krampaköst, t.d. frá einum manni sem skrifaði: Ég er í 6 daga ferð með gyðingahjónum. Þau tíma engu. Hversu gott er það?? :) Ég spyr: Eru Skotar ekki nískasta þjóðin? Vonum að það komi ekki að sök á Bessó. 

Ég tók skjámyndir af umræðunni fyrir "flór" minn um hatursræðu gegn gyðingum, sem inniheldur meira og alvarlegra hatursrugl en þann skít sem safnast hefur í kúkasandkassa Gunnars Waage. En er ég ætlaði að skrifa um þessi undur á Bessastöðum hér á bloggið, var hins vegar búið að fjarlægja fagnaðarerindið og neðanstætt merki kom upp á síðu FB-vinar míns. Söguburður hans um ættir frú Elizu hans Guðna forseta var vitaskuld klámhögg og hefur höfundurinn slegið hamrinum á þumal sinn í staðin fyrir naglann. Á, æi, andskotans - ekki er öll dellan eins, en það er mikið af henni á Íslandi og ekki síst á Fésbókinni. En ef fólk trúir á meyjarfæðingar, þá er víst ekkert sjálfsagðara en að Eliza Reid á Bessó sé kosherkona frá gresjum Kanada. Menn mega trúa því svo ef þeir vilja. En satt er það ekki. Eliza er samt örugglega alveg boðleg þrátt fyrir að hún sé ekki alveg eins skyldleikaræktuð og maður hennar.

Amen.